بريشة نسر حرمون مع قبلاتي إلى الطفل الرضيع روجيه س. غ. الذي قرأ النص وباشر بكتابة مذكّراته اللبنانية في بريطانيا العظمى ليذكّرني بالشاعر العظيم ت. س. إليوت:
الحضارة بلبنان يا جدّي سموم طافحة بالسمسرات
وكعابْ كرتون عارية متل ناطحات سحاب ورقصة قطارات
راكضة فوق القمر بالدشاديش وأبو الزلف وعَ بواب السفارات
بلادنا يا جدّي بلاد الحكي الفاضي وولاد بيتقاتلوا زغار، كتير كتير زغار
بيتصالحوا تحت الدرج وبيقسموا الغلّة ع السكت
والناس سهرانة مع البرغش بِرَندِح بهالليل
ورضيع اللي إجا سايح ع لبنان عم يبكي من ريحة المطار
بالصفّ جانن ع كتف إمّو، وبتغيّر الكوش ع حضنها
وملبّكي ين بتخبي المحارم بجزدانها ولاّ بجيبتا
ولبنان حضارة النونو ما إلا عيون ولا سمع
وكإنّو ما فيها بشر
يا للمضحكي ، التغيير والثورات صارت لتّ الحكي قد ما بدّك على الشاشات
ماركس من قبرو صرخ حاج تلعبوا يا هَبَل تْرِكونا نموت شوي
نابليون عم يشرب بقبرو عَرَق وغيفارا صورة معلّقة بشاشات السمر.
صار لبنان بطن الحكي اللي ما بيخلّف إلاّ حكي.
صار وقت الدفع للتغيير وصار وقت القبض للقصر وللغنى وللتعتير.
وصار وقت إرفع صُبّاط ل بنتي وحفيدي بالحكي
وما ملّ وقت الحكي بعد بروسكم يا ناس ؟
بعدو البلد متل سوسي بلبادة جدودكم من دهر
نحنا بعصر مصباح الكهربا إبن صبّاح مقاوم جنوبي
ما فهمنا منكم إنتصر ولاّ ما إنتصر
لبنان بعدو بِ عصر الحجر: قْدَح الحجر وضوّي ديارك وإنقِبِر .
وبالزبالي طريقك، بْحَش وطم حالك يا صبي بعدك قبل عصر الحجر.
نوركم بعدو بلا زغرة متل قنديل النَوَر
وبتعملوها كل يوم تحت الشجر
بالمرجلي إنتو شعب بشع مثل الضجر
خلقتو للزجل والتبخير والكذب عَ مدّ عينك والنظر
مْعَمْشقين بسفينة نوح مثل قارة من غجر
بعدكم بلبنان طعم دايم للحيتان يا بشر
بعد ما السمك ببحركم نفق من جوع أو هجر
غنّوا يا لبنان يا قطعة سما
كُلوا أجسادكم كُلوا ولادكم وكلوا لبنان وموتوا وغنّوا معو.
ارجعوا لا ترجعوا…………………………………….
الإثنين 9/8/2019
