من حسين الجريح في المستشفى الى شربل ونقولا وعمر ومعروف..
تحية من سريري.. عم اتحمل ألمي لانكم الى جانبي..
لفتتكم تجاهي عند إصابتي هي اللي يتخفف عني..
اما صاحبنا ما غيره، فبلغوه السلام. بعده فاكر انو اذا وقعت انا، هو بيسلم.. ذاكرته ضعيفة. ما بيعرف المثل : “اأُكلت يوم أُكل الثور الابيض”.
معليش.. برضو بنحبه شو ما صار، ولو كرهنا.
هو بيعتقد انو نحن بنحب الموت، عكسه هو انو بيحب الحياة!!!
بالله قولوا له انا نحن كمان بنحب الحياة متل ما بنحبه.
قولوا له انو نحن كمان عندنا ام واب واخ واخت وابن وبنت واولاد عم وعمة وخال وخالة واصحاب وجيران وعشنا سهرات تبولة وكبة بالبيوت والضيع..
ولا بد يجي يوم يعرف انو هيدي هي الاشياء اللي منشانها انا اليوم بالمستشفى بلا عينتين واصابع.. بس الحمدلله بعده عقلي وقلبي.. هني بيخلوني شوف الله اللي خلقني وخلقه.. وعلمني
انو حبه شو ما ظن فيي..
بيجي يوم انشالله بيتأكد.. او ابني وابنه بيحكوا عني وعنو.. وبيهزوا براسهم..
❤️❤️❤️❤️❤️❤️❤️
22 أيلول ٢٠٢٤
حسن أحمد خليل
